واشنگٹن: ریپبلکن پارٹی کے صدارتی امیدوار ڈونلڈ ٹرمپ نے اپنے حق میں دستبردار ہونے والے امیدوار رابرٹ ایف کینیڈی جونیئر سے اپنی تقریر کے دوران وعدہ کیا کہ وہ سابق صدر جان ایف کینیڈی کے قتل سے منسلک دستاویزات جاری کریں گے۔
غیر ملکی خبر رساں ادارے کے مطابق ڈونلڈ ٹرمپ نے طویل عرصے سے انسداد ویکسین کے حامی رابرٹ ایف کینیڈی کو اسٹیج پر مدعو کیا اور لوگوں سے پوچھا کیا آپ ایسا صدر نہیں چاہتے جو امریکا کو دوبارہ صحت مند بنائے؟
ریپبلکن پارٹی کے صدارتی امیدوار ڈونلڈ ٹرمپ نے ریلی میں اس بات کا بھی اعلان کیا اگر وہ منتخب ہوگئے تو رابرٹ ایف کینیڈی کے ساتھ مل کر بچوں کی صحت کے مسائل کی تحقیقات کے لیے اعلیٰ ماہرین کا ایک پینل بنائیں گے۔
ڈونلڈ ٹرمپ نے 1963 میں قتل کیے جانے والے اُس وقت کے امریکی صدر جان ایف کینیڈی کے کیس کی تحقیقات کے لیے نئے مجوزہ کمیشن اور تحقیقات کی دستاویزات جاری کرنے کا وعدہ کیا۔
ان خیالات کا اظہار ڈونلڈ ٹرمپ نے اس وقت کیا جب آزاد امیدوار رابرٹ ایف کینیڈی نے اُن کے حق میں صدارتی انتخابات کی دوڑ سے دستبردار ہونے کا اعلان کیا جو سابق صدر جان ایف کینیڈی کے بھتیجے ہیں۔
خیال رہے کہ سابق امریکی صدر جان ایف کینیڈی کو 22 نومبر 1963 کو قتل کردیا گیا تاہم اس پُراسرار قتل کا معمہ کبھی حل نہ ہوسکا جب کہ کچھ لوگوں کا خیال ہے کہ قتل کے پیچھے اس وقت کی اسٹیبلشمنٹ تھی۔
