ارجنٹینا: 60 سالہ الیجینڈرا ماریسا روڈریگز نے ‘مس یونیورس بیونس آئرس’ 2024 کا ٹائٹل جیت کر عمر اور خوبصورتی کے دقیانوسی تصورات کو توڑ دیا۔
بین الاقوامی میڈیا رپورٹس کے مطابق ارجنٹائن سے تعلق رکھنے والی 60 سالہ الیجینڈرا ماریسا روڈریگز نے ‘مس یونیورس بیونس آئرس’ کا جیت اپنے سر سجانے کے بعد مس ارجنٹائن 2024 کے لیے کوالیفائی بھی کر لیا ہے۔
60 سالہ الیجینڈرا ماریسا روڈریگز مئی 2024 میں ہونے والے مس یونیورس ارجنٹائن کے مقابلے میں بیونس آئرس کی نمائندگی کریں گی، اس سے قبل مِس یونیورس کے مقابلے میں صرف 18 سے 28 برس تک کی خواتین حصہ لینے کی اہل تھیں۔
تاہم، مِس یونیورس مقابلے کا اہتمام کرنے والے ادارے نے رواں سال کی شروعات میں اعلان کیا تھا کہ اب اس مقابلے میں 28 سال سے زیادہ عُمر کی خواتین بھی بطورِ اُمیدوار حصہ لے سکتی ہیں۔
الیجینڈرا ماریسا روڈریگز نے ٹائٹل جیتنے کے بعد میڈیا سے گفتگو کرتے ہوئے کہا کہ میں مقابلہ حسن میں اپنے نئے سفر کا آغاز کرنے کے لیے بہت پُرجوش ہوں، مجھے خوشی ہے کہ ججز نے میری عُمر کے بجائے میرے جذبے اور اعتماد کو دیکھا۔
میڈیا رپورٹس کے مطابق الیجینڈرا ماریسا روڈریگز پیشے کے اعتبار سے وکیل اور صحافی ہیں جبکہ اُن کا تعلق ارجنٹائن کے صوبہ بیونس آئرس کے دارالحکومت لا پلاٹا سے ہے۔
خیال رہے کہ اگر الیجینڈرا ماریسا روڈریگز مئی میں ہونے والے مس ارجنٹائن کا مقابلہ جیت گئیں تو وہ ستمبر 2024 میں ہونے والے ‘مس یونیورس’ مقابلے میں حصہ لیکر ارجنٹائن کی نمائندگی کریں گی۔
مس یونیورس کا مقابلہ رواں برس ستمبر میں میکسیکو میں منعقد ہوگا جس میں دنیا بھر سے حسینائیں شرکت کریں گی۔
