اسلام آباد:بھارت کی ٹینس کے میدان میں پاکستان کے خلاف سازش کی کوشش ناکام ہو گئی۔ڈیوس کپ ٹینس مقابلے میں انٹرنیشنل ٹینس فیڈریشن نے پاکستان کے حق میں ووٹ دے دیا۔
آئی ٹی ایف نے اگلے سال فروری میں پاکستان میں شیڈول ڈیوس کپ پر بھارتی موٴقف مسترد کر دیا ہے اور اس معاملے میں 15 رْکنی ڈیوس کپ کمیٹی نے دونوں ممالک کا موٴقف لینے کے بعد پاکستان کے حق میں ووٹ دیا ہے۔
انٹرنیشنل ٹینس فیڈریشن نے بھارتی ٹیم کو پاکستان میں میچ کھیلنے کی ہدایت کی ہے۔
پاکستان ٹینس فیڈریشن کا اس حوالے سے کہنا ہے کہ بھارت نے سیکیورٹی خدشات کا بہانہ بنا کر پاکستان آنے سے انکار کیا تھا، پاکستانی وفد نے بھارتی موٴقف کو ماننے سے انکار کر دیا تھا۔
یادرہے کہ بھارت اور پاکستان کے درمیان ڈیوس کپ ٹائی مقابلے فروری کے پہلے ہفتے میں شیڈول ہیں۔
