ڈھاکا: بنگلادیشی طلبا رہنماؤں نے دعویٰ کیا ہے کہ وزیراعظم شیخ حسینہ واجد کے حکومت کے خاتمے کے بعد بننے والی عبوری حکومت کے فریم کو ہم طے کریں گے۔
غیر ملکی خبر رساں ادارے کے مطابق آرمی چیف جنرل وقار الزماں نے شیخ حسینہ واجد کے استعفے اور پھر بھارت روانگی کے بعد پریس کانفرنس میں کہا تھا کہ اب ملک ایک عبوری حکومت چلائے گی۔
آرمی چیف نے مزید کہا تھا کہ اس عبوری حکومت میں مختلف سیاسی جماعتوں کو نمائندگی دی جائے گی اور اس سلسلے میں انھوں نے صدر محمد شہاب الدین سے ملاقات کا عندیہ بھی دیا تھا۔
بعد ازاں بنگلادیشی فوج کے ترجمان نے ایک بیان میں کہا تھا کہ آرمی چیف جلد اساتذہ اور طلبا رہنماؤں سے ملاقات کریں گے اور عبوری حکومت سازی پر تبادلہ خیال کریں گے۔
ادھر طلبا رہنماؤں کا کہنا ہے کہ انھوں نے تاحال سڑکوں پر ہی رہنے کا فیصلہ کیا ہے کیوں کہ ہمارا مطالبہ ہے عبوری حکومت کی تشکیل میں ہماری تجاویز کو بھی دیکھا جائے۔
