تاروبا: آئی سی سی ٹی 20 ورلڈ کپ 2024ء کے پہلے سیمی فائنل میچ میں افغانستان کو 9 وکٹوں سے باآسانی شکست دے کر ساوٴتھ افریقہ پہلی بار فائنل میں پہنچ گیا، فاتح ٹیم نے57 رنز کا ہدف 9 ویں اوور میں ہی پورا کر لیا۔
انٹرنیشنل کرکٹ کونسل کے زیر اہتمام امریکا اور ویسٹ انڈیز کی میزبانی میں ہونے والے ٹی ٹوئنٹی ورلڈ کپ 2024ء کے پہلے سیمی فائنل میچ میں افغانستان نے ٹاس جیت کر ساوٴتھ افریقہ کو فیلڈنگ کرنے کی دعوت دی، دونوں ٹیمیں برائن لارا کرکٹ سٹیڈیم میں مدمقابل ہوئیں۔
افغان ٹیم کی جانب سے ٹاس جیت کر بیٹنگ کرنے کا فیصلہ بری طرح ناکام ثابت ہوا اور ساوٴتھ افریقہ کی تباہ کن باوٴلنگ کے سامنے تمام بیٹرز بے بس نظر آئے، عظمت اللہ عمرزئی کے علاوہ کوئی بھی کھلاڑی ڈبل فگر میں داخل نہ ہو سکا، اوپنر رحمان اللہ گرباز، محمد نبی اور نور احمد بغیر کھاتہ کھولے ہی آوٴٹ ہو کر واپس لوٹ گئے۔
عظمت اللہ عمرزئی نے 10، گلبدین نائب نے 9، کریم جنت، کپتان راشد خان نے 8، 8، ابراہیم زدران، ننگیالیا کھروٹ اور نوین الحق نے 2، 2، رنز بنائے، یوں پوری افغان ٹیم 11.5 اوورز میں 56 رنز پر ڈھیر ہو گئی، ساوٴتھ افریقہ کی جانب سے مارکو جانسن اور بتریز شمسی نے 3، 3، کاگیسوربادا اور اینریچ نوکیا نے 2، 2 وکٹیں حاصل کیں۔
57 رنز کے ہدف کے جواب میں ساوٴتھ افریقہ نے بیٹنگ شروع کی تو ان کیخلاف افغان پلیئرز باوٴلنگ میں بھی اچھی کارکردگی نہ دکھا سکے جبکہ صرف فضل الحق فاروقی نے گزشتہ میچوں کی طرح اپنی پرفارمنس برقرار رکھی اور پہلے ہی اوور میں اوپنر کوئنٹن ڈی کوک کی وکٹ حاصل کی۔
کوئنٹن ڈی کوک کے آوٴٹ ہونے کے بعد ریزا ہینڈرکس اور کپتان ایڈن مارکرم نے 8.5 اوورز میں ہدف آسانی سے عبور کر لیا، دونوں نے بالترتیب 29 اور 23 رنز بنائے، شاندار کامیابی کے ساتھ جنوبی افریقہ تاریخ میں پہلی بار کسی بھی میگا ایونٹ کے فائنل میں پہنچ گیا ہے۔
آج شام ساڑھے 7 بجے دوسرا سیمی فائنل بھارت اور انگلینڈ کی ٹیموں کے درمیان کھیلا جائے گا، جیتنے والی ٹیم کا مقابلہ فائنل میں جنوبی افریقہ سے ہو گا۔
