ریاض : سعودی عرب نے اسرائیلی فورسز کی جانب سے غزہ پٹی میں ورلڈ سینٹرل کچن تنظیم کے کارکنوں کو نشانہ بنائے جانے کی شدید مذمت کی ہے۔وزارت خارجہ کی جانب سے عالمی برادری سے مطالبہ کیا گیا کہ وہ ان خلاف ورزیوں کو روکنے کے لئے فوری نوٹس لے۔
غیرملکی خبررساں ادارے کے مطابق وزارت خارجہ کے بیان میں کہا گیا ہے کہ امدادی کارکنوں کو نشانہ بنانے کی کارروائی اسرائیل کی جانب سے مسلسل بین الاقوامی انسانی قوانین اورغاصبانہ جرائم کا تسلسل ہے۔
وزارت خارجہ نے مملکت کی جانب سے امدادی تنظیموں اور کارکنوں کو نشانہ بنانے کی کارروائیوں کو پھر مسترد کرتے ہوئے عالمی برادری سے مطالبہ کیا کہ’ وہ ان خلاف ورزیوں کو روکنے کے لئے فوری نوٹس لے۔
بیان میں عالمی برادری سے مزید مطالبہ کیا گیا کہ ’وہ شہریوں اور انسانی ہمدردی کی بنیاد پر کام کرنے والی فلاحی تنظیموں کے تحفظ کو یقینی بنانے کے لیے اپنا کردار ادا کریں تاکہ غزہ پٹی میں متاثرین کو جلد از جلد اور مستقل بنیادوں پر امداد کی فراہمی کو یقینی بنایا جاسکے۔
یاد رہے کہ امریکہ کی امدادی تنظیم ’ورلڈ سینٹرل کچن‘ کے ارکان کو دیر البلاح میں اپنے ویئر ہاوٴس سے روانگی کے موقع پر اسرائیلی فوج نے بمباری کر کے ہلاک کر دیا تھا۔
اسرائیلی وزیراعظم نیتن یاہو نے اس حوالے سے کہا ہے کہ غزہ میں غیر ملکی این جی او ”ورلڈ سینٹرل کچن“ کی گاڑی پر فضائی حملہ افسوسناک اور غیر ارادی طور پر ہوا تھا،یقین دلاتا ہوں کہ ایسا واقعہ دوبارہ نہیں ہوگا۔
