لندن:برطانیہ کی پرنسسز آف ویلز کیٹ مڈلٹن سرجری کے بعد گھر واپس پہنچ گئیں۔ وہ پیٹ کی سرجری کے لیے سولہ جنوری کو اسپتال میں داخل ہوئی تھیں۔
لندن سے کینسنگٹن پیلس کے مطابق کیٹ مڈلٹن کی طبیعت بہتر ہے اور وہ تیزی سے روبہ صحت ہیں۔ تاہم امید کی جارہی ہے کہ وہ اپنے شوہر پرنس ویلیم کے ساتھ اپنی شاہی مصروفیات ایسٹر سے قبل شروع نہیں کرسکیں گی ۔
خبر ایجنسی کے مطابق 42 سالہ شہزادی کیٹ مڈلٹن کی دو ہفتے پہلے لندن کے اسپتال میں سرجری ہوئی تھی۔
ادھر شاہ برطانیہ اور کیٹ کے سسر چارلس سوم اب بھی لندن کے کلینک میں زیر علاج ہیں جہاں وہ گزشتہ جمعہ کو بڑھے ہوئے پروسٹیٹ کی سرجری کے لیے داخل ہوئے تھے۔
شاہ چارلس سوم اپنے آپریشن سے قبل شہزادی کیٹ مڈلٹن کی عیادت کے لیے ملکہ کمیلا پارکر کے ساتھ اسپتال بھی گئے تھے۔
