راولپنڈی :عوامی مسلم لیگ کے سربراہ شیخ رشید احمد کا پی ٹی آئی کی حمایت کھونے کے بعد اہم وڈیو پیغام سامنے آگیا۔ کہا کہ زندگی میں موجودہ چھ سات ماہ کی بڑی تکلیفوں کا سوچ بھی نہیں سکتا، 40 دن چلہ کاٹا، غاروں تک میں رکھا گیا تاکہ ایک شخص کی فیملی اور اسکی اہلیہ کے خلاف 164 کا بیان جاری کروں لیکن میں پھر بھی دوستی نبھاوٴں گا ۔
عوامی مسلم لیگ کے سربراہ و این اے 56 سے امیدوار شیخ رشید احمد نے اپنے وڈیو پیغام میں کہا کہ میرے گھر توڑے گئے،خاندان کے ہر فرد کیساتھ زیادتی ہوئی مگر ڈٹا رہا اور ڈٹا ہوں، 17 مرتبہ وزیر رہا، بعض لوگوں نے ٹکٹ کے قابل نہیں سمجھا، ایسوں کو ٹکٹ دیا گیا جو رات ہی لندن سے یہاں آئے۔
انہوں نے کہا کہ اصولی آدمی ہوں، قوم کو بتانا چاہتا ہوں میں امتحان میں پاس ہوا جھکا نہیں، سچ کیساتھ جٹان کی طرح کھڑا رہا، عوام کا امتحان ابھی باقی ہے، این اے 56 سے قوم نے قلم دوات کو جتانا ہے، امریکہ سے اڑان بھرنے والوں کو بتانا ہوگا کہ قوم زندہ ہے، شیخ رشید احمد جان دیدے گا لیکن دوستی پہ حرف نہیں آنے دے گا۔
عوامی مسلم لیگ کے سربراہ نے کہا کہ ساری قوم سے اپیل ہے 8 فروری کو قلم دوات پر مہر لگائے، تاریخی جیت ہوگی۔
