اسلام آباد:جمعیت علماء اسلام کے کارکن نے سکیورٹی کیلئے چیف الیکشن کمشنر کو درخواست دے دی۔
درخواست میں مؤقف اختیار کیا گیا الیکشن کمیشن نے انتخابی شیڈول کا اعلان کر دیا ہے، جس کے تحت 8 فروری کو پورے ملک میں انتخابات ہونے ہیں۔
دو دن قبل ڈیرہ اسماعیل خان میں مولانا فضل الرحمان کے سکواڈ پر حملہ ہوا، دونوں اطراف سے فائرنگ کی گئی۔
درخواست میں مزید کہا گیا کہ اس سے قبل بھی مرکزی جنرل سیکرٹری مولانا عبدالغفور حیدری، حافظ حمد اللہ اور خار میں جے یو آئی کے پروگرام پر حملے ہوئے، جس کے نتیجے میں سینکڑوں کارکن شہید ہوئے، الیکشن کے دوران امن و امان قائم رکھنا بھی الیکشن کمیشن کی ذمہ داری ہے۔
کارکن نے درخواست میں استدعا کی کہ ہمارے قومی اور صوبائی اسمبلی کے امیدواروں کو معقول سکیورٹی فراہم کی جائے تاکہ جے یو آئی کو لیول پلیئنگ فیلڈ مل سکے، کسی بھی نقصان کی ذمہ داری الیکشن کمیشن اور امن وامان قائم رکھنے والے ذمہ دار اداروں پر ہو گی۔
