نئی دہلی:بھارتی ریاست تامل ناڈو میں طوفانی بارشیں جاری ہیں جس کی وجہ سے مختلف حادثات میں 10 افراد ہلاک ہو گئے۔
بھارتی میڈیا کے مطابق گزشتہ 2 دنوں سے ریاست کے جنوبی اضلاع میں شدید بارشیں ریکارڈ کی جا رہی ہیں جس کے سبب نظام زندگی بری طرح متاثر ہے، ضلع ترونل ویلی اور دیگر اضلاع میں بارش کے دوران دیواریں گرنے اور کرنٹ لگنے کے واقعات رپورٹ ہوئے ہیں۔
حکام کے مطابق ضلع توتیکورن کے علاقے کیالپٹنم میں گزشتہ 2 دنوں میں 1186 ملی میٹر بارش ہوئی اور تروچندر میں 921 ملی میٹر بارش ریکارڈ کی گئی جب کہ ضلع توتیکورن میں بہت سے مقامات اور گاؤں ندی کے کنارے واقع ہیں جو سیلاب کی وجہ سے متاثر ہوئے۔
حکام نے بتایا سیلاب اور ہنگامی صورتحال سے عوام کو ریسکیو کرنے میں بحریہ، فضائیہ، نیشنل ڈیزاسٹر رسپانس فورس سمیت دیگر ریاستی اداروں کے تقریباً ایک ہزار 343 اہلکاروں نے حصہ لیا، اہلکاروں نے 160 ریلیف کیمپوں میں 17 ہزار کے قریب لوگوں کو پناہ فراہم کی۔
بھارتی میڈیا کے مطابق بارش کے سبب موبائل نیٹ ورک سروس معطل ہونے کی وجہ سے ریسکیو کے کاموں میں دشواریاں پیش آئیں جس کیلئے انتظامیہ کی جانب سے 200 کے قریب وائرلیس ٹیلی فون استعمال کیے گئے۔
