راولپنڈی :ڈیرہ اسماعیل خان میں دہشتگردوں نے پرائیویٹ کمپنی کی گاڑی پر فائرنگ کر کے 2 ملازمین اور ایک سکیورٹی گارڈ کو شہید کر دیا۔
آئی ایس پی آرکے مطابق دہشتگردی کا واقعہ ڈیرہ اسماعیل خان کے علاقے درہ زندہ میں پیش آیا جہاں علاقے میں ترقیاتی منصوبے پر کام کرنے والی پرائیویٹ کمپنی کی گاڑی پر فائرنگ کر دی گئی۔
آئی ایس پی آر کاکہناہے کہ گولیاں لگنے کے نتیجے میں دو ملازمین موقع پر ہی دم توڑ گئے، شہید ہونے والوں میں 35 سالہ محمد فیصل اور 29 سالہ آصف کامران شامل ہیں، ملازمین کی سکیورٹی پر مامور سپاہی محمد شاہین شاہ بھی بہادری سے لڑتے ہوئے جام شہادت نوش کر گیا۔
آئی ایس پی آر کاکہناہے کہ سکیورٹی فورسز نے علاقے میں ممکنہ دہشتگردوں کے خاتمے کیلئے کلیئرنس آپریشن کیا ہے، سکیورٹی فورسز دہشتگردی کی لعنت کے خاتمے کیلئے پرعزم ہیں۔
