واشنگٹن: پاکستان تحریک انصاف کے رہنماوٴں کی حالیہ گرفتاریوں پر امریکا کی جانب سے ردعمل سامنے آگیا ہے۔
واشنگٹن میں پریس کانفرنس کے دوران گفتگو کرتے ہوئے امریکی محکمہ خارجہ کے ترجمان میتھیو ملر نے کہا ہے کہ ہم نے پی ٹی آئی رہنماوٴں کی گرفتاری کی رپورٹس دیکھی ہیں، اپوزیشن لیڈروں کی گرفتاری پر تشویش رہتی ہے۔
ترجمان امریکی محکمہ خارجہ میتھیو ملر نے مزید کہا کہ قانون کی حکمرانی، آئینی اور جمہوری اصولوں کی پرامن برقراری کی حمایت کرتے ہیں، پاکستان کے آئین و قوانین کے مطابق ان اصولوں کا احترام کرنے پر زور دیتے ہیں۔
یاد رہے کہ دو روز قبل پولیس نے پی ٹی آئی سیکرٹریٹ پر چھاپہ مار کر روٴف حسن کو گرفتار کیا تھا ان کے علاوہ متعدد خواتین کو بھی حراست میں لینے کا دعویٰ کیا گیا، اہلکار سیکرٹریٹ سے کمپیوٹر اور دیگر سامان بھی ساتھ لے گئے۔
