پشاور: تحریک انصاف پر پابندی کے معاملے پر سابق سینیٹر مشتاق احمد خان نے کہا کہ تحریک انصاف کو بحیثیت جماعت غیرقانونی قرار دیکر پابندی لگانا اور تحریک انصاف کی لیڈر شپ کے اوپر آرٹیکل 6 لگانا بدترین حماقت ہے۔
ایک بیان میں سینیٹر مشتاق احمد خان نے کہا کہ یہ کیسی جمہوری حکومت ہے جو سیاسی جماعتوں پر پابندی اور سیاسی قائدین پر ملک سے غداری کے مقدمات قائم کر رہی ہے، یہ جمہوریت کی بساط لپیٹنے کی کوشش ہے۔
انہوں نے کہا کہ ماضی کا سبق یہ ہے کی سیاسی جماعتوں پر پابندی اور سیاسی قیادت پر غداری کے مقدمات قائم کرنے سے نہ سیاسی جماعت کو ختم کیا جا سکا ہے اور نہ ہی سیاسی قیادت کو، یہ ملک کے سیاسی حالات کو مزید بگاڑ کی طرف لے جائے گا۔
سابق سینیٹر نے مزید کہا کہ یہ سپریم کورٹ کے فیصلے کو نہ ماننا ہے اور یہ وہ پھندا ہے جو موجودہ اتحادی حکومت کے گلے میں پڑے گا، کیا شہباز شریف کو بجلی کے بھاری بھرکم بل، بدترین مہنگائی، بے قابو دہشتگردی اور سٹریٹس کرائم اور بے انتہا بے روزگاری نظر نہیں آ رہی کہ وہ ملک کو ایک مزید سیاسی دلدل کے اندر دھکیل رہے ہیں؟۔
مشتاق احمد خان نے کہا کہ یہ فیصلہ قابل مذمت ہے، تمام سیاسی جماعتیں، سیاسی قیادت اس کو مسترد کریں اور اس جمہوریت دشمن فیصلے کے خلاف ڈٹ جائیں، کیا اس ملک کے آئین کو پاؤں تلے روندنے والے اور جغرافیہ کو ٹکڑے کرنے والے جرنیلوں کے اوپر کبھی پابندی اور آرٹیکل 6 لگایا گیا ہے؟
