راولپنڈی: بانی تحریک انصاف عمران خان کے خلاف لاہور میں درج 9 مئی کے مقدمات کی تفتیش کے لیے لاہور پولیس کے 11 افسران پر مشتمل ٹیم اڈیالہ جیل پہنچ گئی۔
جیل ذرائع کے مطابق اڈیالہ جیل پہنچنے والی لاہور پولیس کی ٹیم 10 انسپکٹرز پر مشتمل ہے۔
ذرائع کا کہنا ہے کہ انسپکٹر اسلم، انسپکٹر اشرف، انسپکٹر محمد نواز، انسپکٹر رانا اکمل ٹیم میں شامل ہیں۔
لاہور پولیس کی ٹیم اڈیالہ جیل کے گیٹ نمبر 5 سے اندر داخل ہوئی ہے۔
خیال رہے کہ اس سے قبل توشہ خانہ کے نئے ریفرنس میں بانیٔ پی ٹی آئی اور بشریٰ بی بی کے ریمانڈ کے لیے نیب ٹیم اڈیالہ جیل پہنچی تھی۔
گزشتہ روز نیب نے پاکستان تحریکِ انصاف کے بانیٔ عمران خان اور ان کی اہلیہ بشریٰ بی بی کو نئے توشہ خانہ ریفرنس میں گرفتار کیا تھا۔
یاد رہے کہ گزشتہ روز اسلام آباد کی ڈسٹرکٹ اینڈ سیشن کورٹ نے عمران خان اور بشریٰ بی بی کیخلاف دوران عدت نکاح کیس میں سزا کے خلاف اپیلیں منظور کر کے 7، 7 سال کی سزا کالعدم قرار دیتے ہوئے دونوں کو کیس سے بری کرنے کا حکم دیا تھا۔
