اسلام آباد: سابق وزیراعظم آزاد کشمیر سردار عبدالقیوم نیازی نے کہا کہ بدقسمتی سے آزاد کشمیر میں رجیم چینج کے اثرات ایک سال بعد مرتب ہورہے ہیں۔آزاد کشمیر میں نئے انتخابات ہونا چاہئیں۔
سابق وزیر اعظم آزاد کشمیر سردار عبدالقیوم نیازی نے کشمیر کی صورتحال پر پریس کانفرنس کرتے ہوئے کہا کہ نو ماہ پہلے بجلی کے حوالے سے تحریک چلی، آزاد کشمیر میں ہماری حکومت لوگوں کو ریلیف دیتی تھی، ہم نے کشمیر میں بلدیاتی الیکشن کرائے۔
سردار عبدالقیوم نیازی نے مزید کہا کہ وزیراعظم آزاد کشمیر ایک کٹ پتلی وزیراعظم ہے، کشمیر میں شہید ہونے والے پولیس اہلکار کی موت کی تفتیش ہونی چاہئے۔
انہوں نے مزید کہا کہ ایک افواہ پھیلائی گئی کہ ایف سی تعینات ہو گئی ہے اس سے اشتعال بڑھا ہے، کبھی کہا جاتا ہے کہ صدر زرداری نے ایف سی واپس بلا لی ہے، کشمیری حکومت نے لوگوں کے ساتھ معاہدہ کر کے توڑا، کشمیر میں انٹرنیٹ سروس بند ہے۔
سابق وزیراعظم نے کہا کہ وزیراعظم آزاد کشمیر کو فی الفور مستعفی ہونا چاہئے، فاروڈ بلاک بنا کر اچانک یہ حکومت بنائی گئی تھی، آزاد کشمیر میں نئے انتخابات ہونا چاہئیں۔
