ویلنگٹن: نیوزی لینڈ کے سابق لیگ اسپنر جیک الابسٹر 93 سال کی عمر میں مختصر علالت کے بعد وفات پا گئے ۔
نیوزی لینڈ کرکٹ کی گورننگ باڈی کی جانب سے جاری بیان میں کہا گیا ہے کہ جیک الابسٹر کی قومی ٹیم کے لیے خدمات ناقابل فراموش ہیں۔ وہ نیوزی لینڈ ٹیم کے اوّلین معماروں میں سے ایک تھے۔
جیک الابسٹر کے دوست اور ساتھی کرکٹر 94 سالہ ٹریور میکموہن نے جیک الابسٹر کو خراج تحسین پیش کرتے ہوئے کہا کہ یادوں کا سنہرا دور ہمیشہ کے لیے دفن ہوگیا۔ ٹریور میکموہن نیوزی لینڈ سب سے عمر رسیدہ حیات کرکٹر ہیں۔
یاد رہے کہ 1955 سے 1972 تک قومی ٹیم کا حصہ رہنے والے جیک الابسٹر نے 38.02 کی اوسط سے 49 وکٹیں حاصل کی تھیں۔
جیک الابسٹر نے 12 سال تک نیوزی لینڈ کی جانب سے کھیلتے ہوئے 21 ٹیسٹ میچوں اپنی باؤلنگ سے مخالف بلے بازوں کو پریشان رکھا۔ وہ نیوزی لینڈ کرکٹ ٹیم کی 4 اوّلین فتوحات میں شامل تھے۔
جیک الابسٹر نے اپنے کیریئر کے دوران 1955-56 میں بھارت اور پاکستان، 1958 میں انگلینڈ، 1961-62 میں جنوبی افریقا اور 1971-72 میں ویسٹ انڈیز کا دورہ کیا تھا۔
لیگ اسپنر نے ڈومیسٹک کرکٹ میں اوٹاگو کی نمائندگی کرتے ہوئے 143 میچوں میں 500 فرسٹ کلاس وکٹیں حاصل کیں۔ ریٹائرمنٹ کے بعد جیک الابسٹر نے انورکارگل میں کنگسویل ہائی اسکول کے پرنسپل کے طور پر خدمات انجام دیں اور 1981 میں اسی شہر میں ساؤتھ لینڈ بوائز ہائی اسکول کے ریکٹر کے طور پر بھی کام کیا۔
