راولپنڈی :جمعیت علمائے اسلام نے آزاد امیدوار سابق وفاقی وزیر چوہدری نثار علی خان کی حمایت کا اعلان کر دیا۔ حمایت کا فیصلہ حلقہ این اے 53 پر جے یو آئی امیدوار ایاز شاہین کے کاغذات نامزدگی مسترد ہونے کے بعد کیا گیا۔
جامعہ اسلامیہ صدر راولپنڈی میں چوہدری نثار کے فوکل پرسن شیخ ساجد اور ضلعی امیر جے یو آئی ڈاکٹر ضیاء الرحمن نے مشترکہ پریس کانفرنس کرتے ہوئے کہا کہ جے یو آئی حلقہ این اے 53 پر چوہدری نثار کی جبکہ پی پی 19 پر چوہدری نثار جے یو آئی کے امیدوار ضیاء اللہ خان کی حمایت کریں گے۔
ڈاکٹر ضیاء الرحمن نے کہ جمعیت علمائے اسلام راولپنڈی میں ہر قومی اور صوبائی سیٹ پر الیکشن میں حصہ لے رہی ہے ،، حلقہ این اے 53 پر کاغذات مسترد ہونے پر ہمارے آپس میں رابطے ہوئے۔چوہدری نثار خان صاحب بڑی شخصیت ہیں ان کی حلقے کیلئے خدمات ہیں، مساجد اور مدارس کا خیال رکھا ہے۔
انہوں نے کہا کہ وفاقی وزیر داخلہ کے طور پر انہوں نے جو کام کئے وہ کسی سے پوشیدہ نہیں ہیں الیکشن میں بھرپور حمایت کریں گے،، چوہدری نثار کے فوکل پرسن شیخ ساجد جے یو آئی کے اکابرین کی حمایت پر شکریہ ادا کیا۔
