لاہور:پاکستانی نوجوان بلال الیاس جہانگیر نے نامور امریکی گلوکارہ ٹیلر سوئفٹ کے ایک منٹ میں 30 گانے پہچان کر منفرد ریکارڈ بنا لیا اور گنیز بک آف ورلڈ ریکارڈز میں اپنا نام درج کروا دیا۔
گنیز بک آف ورلڈ ریکارڈز کی آفیشل ویب سائٹ کے مطابق بلال الیاس جہانگیر امریکی گلوکارہ ٹیلر سوئفٹ کے بہت بڑے مداح ہیں، انہوں نے ایک منٹ میں ان کے سب سے زیادہ گانے پہچان کر نیا ریکارڈ بنایا ہے۔
بلال الیاس نے 2019 میں برطانوی شہری ڈین سمپسن کے ایک منٹ میں 27 گانے پہچاننے کا ریکارڈ توڑا ہے۔
ٹیلر سوئفٹ کے سب سے زیادہ فروخت ہونے والے 50 گانوں کی فہرست تیار کی گئی جس میں بلال کو بغیر کسی میوزک کے ہر گانے کے ابتدائی الفاظ سننے تھے اور معلوم کرنا تھا کہ یہ کون سا گانا ہے۔
دلچسپ بات یہ ہے کہ یہ گانے ٹیلر سوئفٹ کی اپنی آواز میں نہیں بلکہ کسی اور انسان کی جانب سے بولے گئے تھے۔
بلال کا کہنا تھا کہ یہ ریکارڈ بہترین طریقہ ہے کہ وہ ٹیلر سوئفٹ کے کتنے بڑے مداح ہیں، وہ روزانہ ٹیلر سوئفٹ کے گانے سنتے ہیں لیکن اس ریکارڈ کو کامیاب بنانے کیلئے انہوں نے 13 ہفتے تک تیاری کی تاکہ وہ زیادہ سے زیادہ گانے پہچان سکیں۔
ان کا کہنا تھا کہ تیاری کے دوران وہ نیند میں بھی گانے کے بول گنگناتے رہتے تھے، ٹیلر سوئفٹ کے گائے ہوئے گانے کے بجائے کسی دوسرے انسان کی آواز میں دھنوں کو پہچاننا مشکل تھا۔
یہ بلال کا تیسرا گنیز ورلڈ ریکارڈ ٹائٹل ہے، انہوں نے اس سے قبل 2021 میں ایک منٹ میں جانوروں کی صرف آوازیں پہچان کر سب سے زیادہ جانوروں کی شناخت کرنے کا ریکارڈ بنایا تھا اور پچھلے سال 2023 میں انہوں نے ایک منٹ میں امریکی گلوکار جسٹن بیبر کے سب سے زیادہ گانے پہنچاننے کا ریکارڈ قائم کیا تھا۔
تاہم بلال الیاس کہتے ہیں کہ ٹیلر سوئفٹ کے گانے پہنچاننے کا ریکارڈ ان کا سب سے پسندیدہ ریکارڈ ہے۔
