گجرات: مسلم لیگ (ق) کے رہنما چوہدری سالک حسین نے کہا ہے کہ ہماری ابھی بھی خواہش ہے کہ ہمارے خاندان میں پہلے کی طرح اتفاق و اتحاد ہو جس کی لوگ مثالیں دیں، امید ہے ہم سب جلد ایک پیج پر ہوں گے۔
کاغذات نامزدگی جمع کروانے کے بعد چوہدری سالک حسین نے الیکشن مہم کا آغاز کر دیا، چوہدری وجاہت حسین بھی اپنے بھتیجوں سالک حسین اور شافع حسین کی انتخابی مہم میں شامل ہیں۔
اس حوالے سے گفتگو کرتے ہوئے چوہدری سالک حسین نے کہا کہ سوشل میڈیا پر ابہام ہے کہ ہمارے خاندان میں مسائل بنے ہوئے ہیں، آج چوہدری وجاہت صاحب ہمارے ساتھ ہیں جس سے دونوں بھائیوں کے حوصلے بلند ہوئے ہیں۔
چوہدری سالک حسین کا مزید کہنا تھا کہ چوہدری وجاہت حسین انتخابی مہم میں ہمارے ساتھ ہیں، ان کا ہمارے ساتھ چلنا ایسے ہی ہے جیسے والد ہمارے ساتھ ہیں۔
