اسلام آباد:احتساب عدالت اسلام آبادنے ٹھٹھہ واٹر سپلائی ریفرنس میں آصف علی زرداری، عبدالغنی مجید اورمناہل مجید کی حاضری سے استثنیٰ درخواستیں منظور کرتے ہوئے شریک ملزم اشفاق لغاری کو ریفرنس کی نقول فراہم کرنے کی ہدایت کردی۔
احتساب عدالت کے جج محمد بشیر نے ٹھٹھہ واٹر سپلائی ریفرنس کی سماعت کی، سابق صدرپاکستان آصف علی ذرداری کیوکیل اسد عباسی ایڈووکیٹ،وکلاء صفائی ارشد تبریز، محمد رافع اور دیگر عدالت پیش ہوئے۔
آصف علی ذرداری، عبدالغنی مجید اور مناہل مجید کی حاضری سے استثنیٰ درخواستیں دائرکی گئیں جنہیں عدالت نے منظور کرلیا، وکیل صفائی ارشد تبریز نے کہاکہ ریفرنس میں صرف آصف ذرداری منتخب نمائندے ہیں، باقی تمام ملزمان پبلک اور سرکاری ملازم ہیں،اشفاق احمدلغاری پہلے پیش نہیں ہوئے تھے اب آئے ہیں، نقول تقسیم کرنی ہیں۔
عدالت نے پراسیکیوٹر سے کہاکہ نقول تیار کرلیں اور آئندہ سماعت پر دے دیں،عدالت نے سماعت15 فروری تک کیلئے ملتوی کردی۔ملزمان میں سابق سیکرٹری اعجاز احمد خان، علی اکبر، اعجاز میمن، علی اکبر ابرو،خواجہ عبدالغنی مجید، مناہل مجید،عبدالندیم بھٹو بھی شامل ہیں۔
