اسلام آباد:ایک طرف تو نئے سال 2024ء کی آمد ہے، وہیں اگر اختتام پذیر ہوتے سال 2023ء پر نظر دوڑائی جائے تو اس دوران گوگل پر ٹاپ ٹرینڈ سرچز سے پاکستانی صارفین کی مختلف دلچسپیوں اور بدلتے ہوئے ذوق کا اظہار ہوتا ہے، جن میں تفریح اور کرکٹ کے شوق سے لے کر خبروں کی زینت بننے والی کہانیاں اور واقعات شامل ہیں۔
پاکستانیوں نے 2023ء میں جن موضوعات پر سب سے زیادہ سرچ کیا، اس حوالے سے گوگل کے دیے گئے اعداد و شمار سے پتا چلتا ہے کہ رواں برس پاکستانیوں کی دلچسپی کس موضوع میں زیادہ رہی۔
شخصیات میں پاکستانیوں نے کسے زیادہ سرچ کیا؟
عوام کی مختلف دلچسپیوں کے مجموعے کی عکاسی کرتی ہوئی 2023ء کے لیے پاکستان میں ”شخصیات“ کے لیے ٹاپ 10 ٹرینڈنگ سرچز میں مختلف نام نظر آئے، جن میں حریم شاہ اور علیزہ سحر اس سال سرچ کی جانے والی شخصیات میں سرفہرست ہیں۔
تیسرے نمبر پر بالی ووڈ اداکار ٹائیگر شروف ہیں جنہیں اس سال ان کی خیریت کے حوالے سے افواہوں کے باعث سرچ کیا گیا ہے۔
ان کے علاوہ فاطمہ طاہر اور عمران ریاض خان سے متعلق خبریں اور ہردم مقبولیت برقرار رکھنے والے اکشے کمار، کاجول اور محمد عامر سے متعلق خبریں بھی اس سا ل کی ٹرینڈنگ سرچز میں شامل تھیں۔
کرکٹ میں دلچسپی رکھنے والے پاکستانی شائقین عبداللہ شفیق اور سعود شکیل جیسے ہونہار کھلاڑیوں اور ابھرتے ہوئے ٹیلنٹ حسیب اللہ خان کو سرچ کرتے رہے۔
علاوہ ازیں گلین میکسویل اور شبمن گل نے بھی عالمی کپ کرکٹ میں اپنی متاثر کن کارکردگی کی بدولت فہرست میں اپنی جگہ بنائی جب کہ عثمان خان نے پاکستان سپر لیگ میں اپنی شاندار اننگرز کی وجہ سے توجہ حاصل کی۔
کرکٹ کی دنیا میں پاکستان میں 2023ء میں سب سے زیادہ سرچ کیے جانے والے ٹاپ 3میچوں کی سرچ سے اس کھیل کے لیے قوم کے جوش و جذبے کی عکاسی ہوتی ہے۔
پاکستان بمقابلہ نیو زی لینڈ، پاکستان بمقابلہ افغانستان اور پاکستان بمقابلہ آسٹریلیا انتہائی دلچسپ مقابلے تھے۔
عالمی کرکٹ کپ کے آخری مرحلے میں بھارت اور نیوزی لینڈ کے درمیان کھیلے جانے والے میچ نے چوتھی پوزیش حاصل کی۔
علاوہ ازیں مزید تلاش میں پاکستان بمقابلہ نیدرلینڈز، پاکستان بمقابلہ بھارت، آسٹریلیا بمقابلہ انگلینڈ، پاکستان بمقابلہ سری لنکااور پاکستان بمقابلہ انگلینڈ شامل تھے۔
پاکستان کے نگراں وزیر اعظم انوار الحق کاکڑ بھی سرچ کی فہرست میں شامل ہیں، جس سے سیاست میں پاکستانیوں کی دلچسپی کا اندازہ ہوتا ہے۔
حماس اور اسرائیل جنگ کی خبریں گوگل پر تلاش میں سرفہرست رہیں اور اس سال سب سے زیادہ ٹرینڈ نگ سرچ کے طور پر یہ خبر سامنے آتی رہی۔
دوسری جانب لوگوں نے احساس پروگرام کو بھی بہت زیادہ سرچ کیا، جو اس فہرست میں اگلی ٹرینڈنگ سرچ ہے اور یہ حکومت کی مالی امداد کی اسکیموں میں عوام کی دلچسپی کی عکاسی کرتی ہے۔ اس سے یہ بھی اندازہ لگایا جا سکتا ہے کہ اس امدادی پروگرام میں کتنے لوگوں کی دلچسپی رہی۔
پشاور دھماکے کے ہولناک واقعات کی خبر نے امن اور سلامتی کے حوالے سے قوم کو اجتماعی تشویش میں مبتلا کیا، اس کے علاوہ پاکستانی عوام، روپے اور معاشی اشاریوں کو بھی سرگرمی سے تلاش کرتے رہے جو غیر ملکی زر مبادلہ کے اتار چڑھاؤ کی شرح سے خود کوباخبر رکھنا چاہتے تھے اور یہ ٹرینڈ مالی معاملات کے بارے میں ان کی آگہی کو ظاہر کرتا ہے۔
2023ء کے دوران پاکستانیوں نے مذہبی تہواروں، قومی دنوں، کھیلوں کے میگا ایونٹس اور سیاسی پروگرامز میں اپنی دلچسپی ظاہر کی۔ اس حوالے سے ٹاپ فائیو ٹرینڈنگ سرچز کرکٹ کے لیے جوش و خرش کو ظاہر کرتی ہیں، جن میں پاکستان سپر لیگ، ورلڈ کپ، ایشیا کپ، آئی پی ایل اور ایشز جیسے بڑے ٹورنامنٹ نمایاں رہے۔ اس کے علاوہ لنکا پریمیئر لیگ بھی نویں پوزیشن پر ہے۔
سرچ کے رجحانات میں مذہبی تعطیلات بھی نمایاں رہیں۔ مثال کے طور پر پاکستان میں لوگوں نے عید الفطر 2023ء، رمضان المبارک اور عید الاضحیٰ کی تلاش کے ساتھ خوشی کی تقریبات کے لیے بھی گوگل سرچ کو استعمال کیا۔
سیاسی میدان میں گوگل پر پاکستان میں قومی انتخابات 2023ء کو فہرست میں 10 واں نمبر ملا ہے، جس سے جمہوری عمل میں پاکستانیوں کی دلچسپی اجاگر ہوتی ہے۔
پاکستان میں سنیما کا منظرنامہ متنوع اور مسلسل ترقی پذیر ہے جو اس سال کی ٹاپ ٹرینڈنگ سرچز میں نظر آیا۔ نولن (Nolan) کی اوپن ہائیمر (Oppenheimer) کی عمدہ عکاسی نے ٹرینڈنگ سرچز کی فہرست میں اول مقام حاصل کیا، جس کے بعد بالی ووڈ سپر اسٹار شاہ رخ خان کی بلاک بسٹر فلمیں ’جوان ‘اور ’پٹھان‘ رہیں۔ اپنے مخصوص نکتہ نظر اور گرل پاور کی متاثر کن کہانی کے ساتھ عالمی رجحان باربی پاکستان میں خاص طور پر مقبول تھی، جس نے اسے ٹاپ 5 میں شامل کرایا۔
علاوہ ازیں ٹائیگر 3 ، غدر2 ، جان وِک 4 اور ایکسٹریکشن2 کی کامیابی بھی گوگل سرچ سے ظاہر ہوتی ہے کیوں کہ ناظرین 2023ء میں عالمی فلمی مارکیٹ سے مزید ایکشن اور تھرل سے بھرپور فلموں کے لیے بھی بے چین رہے۔
اس دوران دیسی اور ہلکے پھلکے مزاح کے خواہشمند پاکستانیوں نے اپنی توجہ کیری آن جٹا3 کی جانب مبذول کی اور ٹی وی سیریز فرضی نے بھی اس فہرست میں اپنی جگہ بنائی۔
2023ء میں کھانے پکانے کی ٹاپ 10 ٹرینڈنگ سرچز میں مختلف ذائقوں کی تراکیب، تکنیکس اور روایات کی تلاش نظر آئی۔
فہرست کے ابتدائی 3 درجات برصغیر کی مشہور سوغات سموسے، کلیجی اور تہواروں سے متعلق تمام میٹھے پکوانوں کے شہنشاہ شیر خرُما نے حاصل کیے۔
پاکستان میں گوشت کے شوقین افراد نے نمکین گوشت کو اس فہرست میں جگہ دلانے میں مدد کی۔ علاوہ ازیں پیک شدہ ٹماٹر کیچپ کے گھریلو متبادل کی ترکیب بھی ان سرچز میں شامل تھی۔
لذیذ اور آسانی سے تیار ہونے والے اسنیکس میں سے چکن رول کی ترکیب بھی سرچ کی جانے والی فہرست کا حصہ رہی، تاہم مشروبات میں تربوز کا جوس ایک خوش آئند اضافہ ہے جو اس سال پاکستان کے جھلستے ہوئے موسم گرما میں تلاش کیا گیا۔ تربوز ٹھنڈا ہونے کے ساتھ پانی کی کمی کو پورا کرتا ہے۔
کلاسک اسٹیک(Steak)کی ترکیب اور مقبول عام تکہ بوٹی کی فہرست شمولیت بار بی کیو اور گوشت سے بنے پکوانوں کے شوقین پاکستانیوں کی دلچسپی کو ظاہر کرتی ہے۔
بعض صارفین کی دلچسپی تخلیقی سرگرمیوں اور گھریلو امور سے متعلق سرچز میں رہی۔ مثلاً پھولوں کو زیادہ تک تر وتازہ رکھنا یا ہاتھوں سے مہندی صاف کرنا وغیرہ۔
اگر کوئی معاملہ کھٹائی میں پڑجائے تو اس کے حل کی تلاش میں پاکستانی گوگل سے رجوع کرتے ہیں۔ پاکستان میں ٹاپ 10 ٹرینڈنگ’’How to‘‘ سرچز ان سوالات کی ایک جھلک پیش کرتی ہے جو لوگوں نے غیر معمولی حد تک تلاش کیے تھے۔
اس سال واٹس ایپ کی جانب سے چینلز کا فیچر متعارف کروایا گیا، جس میں لوگوں نے بہت زیادہ دلچسپی لی۔
اس سال پاکستانیوں نے کینیڈا کے ویزے کے لیےدرخواست دینے میں غیر معمولی دلچسپی کا اظہار کیا ہے اور یہ بھی گوگل کی ٹرینڈنگ سرچ کی فہرست میں شامل ہوا ہے۔
پاکستانی گوگل صارفین نے میٹرک کے نتائج چیک کرنے کے علاوہ دیگر امتحانی نتائج کو بڑے پیمانے پر تلاش کیا۔
اس کے علاوہ 2023ء مصنوعی ذہانت اور اس کے ارتقا کے حوالے سے بھی ایک اہم سال رہا ، جسے لوگ یقینی طور پر اپنی ویب سائٹس اور ایپس میں شامل کرنا چاہتے تھے۔ مثلاً اسنیپ چیٹ پر AI کے بارے میں سوالات اس سال کی ٹاپ ٹرینڈنگ سرچزمیں شامل رہے۔
گوگل سرچ کے یہ رجحانات نہ صرف ماضی کی عکاسی کررہے ہیں بلکہ ان بدلتے ہوئے ٹرینڈز کی جھلک بھی پیش کرتے ہیں جو آنے والے مہینوں میں پاکستانیوں کو نئے سال میں داخل ہونے پر نہ صرف محظوظ کریں گے بلکہ سیکھنے، ترقی کرنےاور تجسس کے ایک دور میں داخل کریں گے۔
