اسلام آباد :چیمپئنز ٹرافی 2025ء کے انتظامات کا جائزہ لینے کے لیے پاکستان کے دورے پر آنے والے آئی سی سی کے وفد نے چیئرمین پی سی بی محسن نقوی سے ملاقات کی ہے۔محسن نقوی نے کہا کہ آئی سی سی چیمپئنز ٹرافی ٹورنامنٹ کا پاکستان میں انعقاد ایک اعزاز ہے۔تمام ٹیموں کے لیے فول پروف سیکیورٹی انتظامات کیے جائیں گے۔
اسلام آباد میں ہونے والی ملاقات میں وفد نے سیکیورٹی کے حوالے سے انتظامات کو تسلی بخش قرار دیا ہے۔
پاکستان کرکٹ بورڈ کے مطابق محسن نقوی سے آئی سی سی کے وفد نے چیمپئنز ٹرافی ٹورنامنٹ 2025ء کی تیاریوں کے حوالے سے تفصیلی تبادلہ خیال کیا۔
ملاقات میں سیکیورٹی کے انتظامات پر بھی بات ہوئی، آئی سی سی کے وفد نے کراچی اور راولپنڈی میں چیمپئنز ٹرافی کے لیے کیے جانے والے انتظامات پر اطمینان کا اظہار کیا اور انہیں تسلی بخش قرار دیا۔
اس موقع پر چیئرمین پی سی بی محسن نقوی نے آئی سی سی چیمپئنز ٹرافی کے لیے عالمی معیار کے انتظامات کی یقین دہانی کرائی۔
انہوں نے کہا کہ اسٹیڈیمز کی اپ گریڈیشن کا کام چیمپئنز ٹرافی سے قبل ہر صورت مکمل کر لیا جائے گا، تمام ٹیموں کے لیے فول پروف سیکیورٹی انتظامات کیے جائیں گے۔
محسن نقوی نے کہا کہ آئی سی سی چیمپئنز ٹرافی ٹورنامنٹ کا پاکستان میں انعقاد ایک اعزاز ہے، جتنا بڑا ٹورنامنٹ ہے اس کے مطابق انتظامات کو حتمی شکل دے رہے ہیں۔
محسن نقوی نے کہا کہ تمام ٹیموں کے کھلاڑی پْرامن اور محفوظ ماحول میں کرکٹ کے کھیل کو انجوائے کریں گے، اپ گریڈیشن کے بعد سہولتیں عالمی معیار کی ہوں گی۔
