اسلام آباد: پاکستان تحریک انصاف نے اپنے لاپتہ کارکنوں کی بازیابی کیلئے اسلام آباد ہائیکورٹ سے رجوع کر لیا۔
سیکرٹری جنرل عمر ایوب خان نے اسلام آباد ہائیکورٹ میں درخواست دائر کر دی، درخواست میں 16 گمشدہ کارکنوں کی فہرست بھی شامل کی گئی ہے، درخواست میں کہا گیا ہے کہ ان 16 کارکنان میں کچھ کارکنان بازیاب ہو چکے، کچھ ابھی بھی گمشدہ ہیں۔
درخواست میں سیکرٹری داخلہ، سیکرٹری دفاع، آئی جی اسلام آباد کو فریق بنایا گیا ہے، ڈی جی ایف آئی اے، ایس ایس پی سی ٹی ڈی اور ایڈووکیٹ جنرل اسلام آباد کو بھی فریق بنایا گیا ہے۔
درخواست میں استدعا کی گئی ہے کہ عدالت جبری گمشدگی کو آئین کے آرٹیکل 4، 9، 10، 14، 19، 25 کے منافی قرار دے، مخصوص سیاسی جماعت سے وابستگی کی بنیاد پر جبری گمشدگی کو آئین کے آرٹیکل 17، 25 کے منافی قرار دیا جائے۔
پی ٹی آئی نے درخواست میں عدالت سے استدعا کی ہے کہ عدالت حکومت کو جبری گمشدگی کا عمل فوری طور پر روکنے کے اقدامات کرنے کے احکامات دے، عدالت حکومت کو پی ٹی آئی کارکنان کی فوری بازیابی کے احکامات جاری کرے، عدالت فریقین کو پی ٹی آئی کارکنان کی جان و آزادی کا تحفظ کرنے کے احکامات دے۔
درخواست میں کہا گیا ہے کہ عدالت فریقین کو جبری گمشدگی میں ملوث ایجنسیوں و افسران کے تعین کے احکامات دے، عدالت فریقین کو جبری گمشدگی کا سلسلہ ہمیشہ کیلئے بند کرنے کے احکامات جاری کرے۔
