اسلام آباد: سپریم کورٹ کی جانب سے مخصوص نشستیں تحریک انصاف کو دینے کے فیصلے پر مسلم لیگ ن کے کارکنان نے ایکسپریس ہائی وے پر احتجاج کیا اور عدالت کے خلاف شدید نعرے بازی بھی کی۔
سپریم کورٹ کے تحریک انصاف کے حق میں مخصوص نشستوں کے فیصلے پر پاکستان مسلم لیگ نون کے کارکنان سراپا احتجاج ہوئے اور انہوں نے اسلام آباد کے ایکسپریس وے پر احتجاج کرتے ہوئے مصروف شاہراہ کو بلاک کردیا۔
لیگی کارکنان نے سوہان کے قریب روڈ پر ٹائروں کو آگ لگائی جس کے باعث ٹریفک کی روانی معطل ہوئی۔ مظاہرین نے فیصلہ دینے پر سپریم کورٹ فیصلے کے خلاف نعرے بازی کی۔
مسلم لیگ ن کے کارکنان کی جانب سے احتجاج کے باعث ایکسپریس ہائی وے پر دونوں اطراف ٹریفک بری طرح سے جام ہوگیا جس کے باعث گاڑیوں کی لمبی قطاریں لگ گئیں جبکہ اس دوران پولیس یا انتظامیہ کہیں نظر نہیں آئی۔
