راولپنڈی :پاک فوج کے سربراہ جنرل سید عاصم منیرنے کہاہے کہ پاکستان نے ہمیشہ خطے میں امن و استحکام کی حمایت کی ہے لیکن کسی بھی اشتعال انگیزی یا پاکستان کی علاقائی خودمختاری کی خلاف ورزی کافوری اوربھر پورجواب دیا جائے گا۔
آرمی چیف جنرل سید عاصم منیر جوانوں کے ساتھ عیدمنانے کے لئے اگلے مورچو ں پر پہنچ گئے ۔
پاک فوج کے سربراہ جنرل سید عاصم منیرنے فوجیوں کے ساتھ عیدالاضحی منانے کے لیے حاجی پیر سیکٹر میں لائن آف کنٹرول کا دورہ کیا۔ آرمی چیف نے فرنٹ لائن پر افسروں اور جوانوں کے ساتھ عید کی نماز ادا کی، پاکستان کی سلامتی اور خوشحالی کے لیے دعا کی۔
آرمی چیف کی آمد پر کور کمانڈر راولپنڈی نے ان کا استقبال کیا۔آرمی چیف نے جوانو ں کے ساتھ عید کادن گزارا پاکستان کے شہداء کی قربانیوں کو خراج تحسین پیش کیا۔
آرمی چیف نے مادر وطن کے دفاع کے لیے ان کی لگن، بلند حوصلے اور عزم کو سراہا اور کہا کہ اپنے ملک اور ہم وطنوں کی سلامتی کو یقینی بنانے کے لئے بطور فوجی ہم ڈیوٹی کے دوران اپنے گھروں اور پیاروں سے دور اس طرح کے تہوار منانے پر فخر محسوس کرتے ہیں۔
آرمی چیف نے مقبوضہ کشمیر میں کشمیری عوام کی آزادی کی جدوجہد پر گفتگوکرتے ہوئے اقوام متحدہ کی متعلقہ قراردادوں کے مطابق پاکستان کے اصولی موقف کا اعادہ کیا۔جنر ل عاصم منیر نے کشمیریوں کے خلاف بھارت کے جاری ظلم و بربریت کی مذمت کرتے ہوئے کہا کہ انتخابات کے بعد بھارت پاکستان کے خلاف جھوٹے پروپیگنڈے اور اشتعال انگیزیوں سے اپنی جارحیت اور کشمیری عوام کو نشانہ بنانے کی کوشش کر رہا ہے، اس طرح کے ہتھکنڈے بشمول جعلی فلیگ آپریشنز بھارت کا ایک معمول کا سیاسی آلہ بن چکے ہیں۔
آرمی چیف نے کہا کہ پاکستان نے ہمیشہ خطے میں امن و استحکام کی حمایت کی ہے لیکن کسی بھی اشتعال انگیزی یا پاکستان کی علاقائی خودمختاری کی خلاف ورزی کا فوری اور پرعزم جواب دیا جائے گا۔
