راولپنڈی:آرمی چیف جنرل سید عاصم منیر نے شمالی وزیرستان، میرانشاہ اور سپن وام کا دورہ کیا، آرمی چیف کا کور کمانڈر پشاور نے پرتپاک استقبال کیا۔
آئی ایس پی آر کے مطابق آرمی چیف نے فوجی جوانوں کے ساتھ نماز عید ادا کی اور پاکستان کے پائیدار استحکام اور خوشحالی کے لئے دعائیں کیں، آرمی چیف نے قوم کے لئے جوانوں کے غیر متزلزل عزم اور خدمت کی لگن کو سراہتے ہوئے انہیں عیدالفطر کی دلی مبارکباد پیش کی۔
آئی ایس پی آر کا کہنا ہے کہ آرمی چیف کو اس موقع پر آپریشنل تیاریوں اور موجودہ سکیورٹی صورتحال کے بارے میں جامع بریفنگ دی گئی، آرمی چیف نے شہداء کی قربانیوں کو خراج عقیدت پیش کیا، انہوں نے کہا کہ امن اور استحکام ہمارے شہداء کی قربانیوں کا ثمر ہے۔
آرمی چیف نے تمام سٹیک ہولڈرز بالخصوص مقامی آبادی پر زور دیا کہ وہ خطے کو غیر مستحکم کرنے کی کوشش کرنے والے مخالف عناصر کے خلاف چوکس رہیں۔
جنرل سید عاصم منیر نے جوانوں سے کہا کہ قوم کی خدمت میں اپنے پیشہ ورانہ فرائض پر غیر متزلزل توجہ مرکوز رکھیں۔
