راولپنڈی:رہنما تحریک انصاف بیرسٹر گوہر نے کہا ہےکہ بانی پی ٹی آئی سے ملاقات پر پابندی غیر قانونی ہے۔
رہنما تحریک انصاف بیرسٹر گوہرکا کہنا تھا کہ یہ طے ہوا تھا کہ بانی پی ٹی آئی سے منگل اور بدھ کو روٹین کی ملاقات ہوگی، بانی پی ٹی آئی نے ملاقات کی ایک لسٹ جاری کی تھی جس میں 10وکلا کا نام تھا۔
انہوں نے کہا کہ ملاقات کیلئے 6لوگوں کی بات ہوئی تھی، آج ہمیں ملاقات کی اجازت نہیں دی گئی نہ بانی پی ٹی آئی سے خاندان کی ملاقات ہوئی ہے۔
بیرسٹر گوہر نے کہا کہ 2ہفتوں کیلئے پابندی لگادی ہے کہ بانی پی ٹی آئی سے ملاقات نہیں ہوسکتی، ایسی بلینکٹ پابندی غیر قانونی و غیر آئینی ہے۔
انہوں نے کہا کہ ہم مطالبہ کرتے ہیں کل تک ہماری بانی پی ٹی آئی تک رسائی ممکن بنائی جائے، ہمیں بانی پی ٹی آئی کی صحت اور سکیورٹی کے بارے بتایا جائے، ہم تحقیقات کا مطالبہ کرتے ہیں کہ کیوں پابندی لگائی گئی ہے؟
بیرسٹر گوہر کا مزید کہنا تھا کہ ہمارے لیے کل کی ملاقات کو یقینی بنایا جائے تاکہ آئندہ کے لائحہ عمل کا اعلان کریں۔
