لاہور: سیف سٹیز اتھارٹی نے بغیر ہیلمٹ موٹر سائیکل چلانے والوں کو ٹریس کرنے کا سافٹ ویئر تیار کر لیا۔
پنجاب میں بغیر ہیلمٹ موٹر سائیکل سواروں کو پکڑنے کیلئے آرٹیفیشل انٹیلی جنس کا استعمال شروع کر دیا گیا، سیف سٹیز اتھارٹی نے بغیر ہیلمٹ موٹر سائیکل چلانے والوں کو ٹریس کرنے کا اپنی نوعیت کا پہلا سافٹ ویئر تیار کیا ہے۔
آئی جی پنجاب ڈاکٹر عثمان انور کا کہنا ہے کہ پنجاب سیف سٹیز اتھارٹی کے سی سی ٹی وی کیمرے سافٹ ویئر کی مدد سے بغیر ہیلمٹ موٹر سائیکلز چلانے والوں کی نشاندہی کریں گے، پنجاب پولیس آرٹیفیشل انٹیلی جنس بیسڈ جدید ٹیکنالوجی کے ذریعے ٹریفک قوانین کا نفاذ یقینی بنا رہی ہے۔
اس حوالے سے ترجمان سیف سٹیز اتھارٹی کا کہنا ہے کہ سافٹ ویئر کے ذریعے ٹریس ہونے والے بغیر ہیلمٹ موٹر سائیکل سواروں کو جرمانہ عائد ہوگا،آرٹیفیشل انٹیلیجنس بیسڈ سافٹ ویئر ایس ایس پی رفعت بخاری نے ایم ڈی سیف سٹیز احسن یونس کی قیادت میں تیار کیا جس کے استعمال سے شہری ٹریفک قوانین پر زیادہ سنجیدگی سے عمل کریں گے۔
ان کا مزید کہنا تھا کہ لاہور ہائی کورٹ کے احکامات کی روشنی میں بغیر ہیلمٹ موٹر سائیکل چلانے پر 2 ہزار روپے جرمانہ ادا کرنا ہوگا، شہری دوران سفر حادثات اور بھاری جرمانے سے محفوظ رہنے کیلئے ہیلمٹ کا استعمال یقینی بنائیں۔
