لاہور:اداکارہ نوشین شاہ نے اداکارہ منال خان پر تنقید کرنیوالوں کو منہ توڑ جواب دے دیا۔
منال خان نے چند دن قبل اپنے بھائی کی شادی کے موقع پراپنی بہن ایمن خان اور بھائی سمیت ان کی شریک حیات کے ہمراہ تصاویر شیئر کیں جس پر سوشل میڈیا صارفین نے ان پر نامناسب تبصرے شروع کردیے۔
تصاویر میں منال خان اور ایمن خان کو بچوں کی پیدائش کی وجہ سے زائد وزن میں دیکھا جا سکتا ہے، جس پر صارفین نے ان کے لیے نامناسب کمنٹس کیے۔
دونوں بہنوں کے ہاں چند ماہ قبل بچوں کی پیدائش ہوئی تھی اور دونوں نے پہلے ہی اس عزم کا اعادہ کیا تھا کہ وہ 2024 میں اپنا وزن کم کریں گی،نوشین شاہ نے منال خان کی جسامت پر تنقید کرنے والی خواتین کے لیے لکھا کہ وہ خدا کا خوف کریں، اداکارہ حال ہی میں بچے کی ماں بنی ہیں۔
نوشین شاہ نے کہا کہ خصوصی طور پر خواتین کو تو ایک عورت کی مشکل کو سمجھنا چاہیے، انہیں اندازہ ہونا چاہیے کہ بچے کی پیدائش کے وقت خاتون کن مشکلات کا سامنا کرتی ہے؟۔
نوشین شاہ نے لکھا کہ عورت 9 ماہ تک اپنے پیٹ میں بچے کو پالتی ہے اور اسی دوران ان کی زندگی میں بہت تبدیلیاں اور مشکلات آتی ہیں اور ایسی مشکلات کو صرف وہی سمجھ سکتی ہے۔
اداکارہ نے کہا کہ منال خان حال ہی میں ماں بنی ہیں،اس لیے ان کی جسامت تبدیل ہوئی ہے، اس لیے اس پر تنقید نہ کی جائے، کیوں کہ ایسی منفی تنقید کا خاتون کی صحت پر برا اثر پڑ سکتا ہے۔
