لاہور:پاکستانی اداکارہ و ماڈل نوشین شاہ نے کہا ہے کہ یکطرفہ محبت ایک سے زیادہ بار ہو سکتی ہے ضروری نہیں ہر بار دھوکا ملے۔
حال ہی میں اداکارہ نوشین شاہ نے نجی ٹی وی شو میں شرکت کی جہاں انہوں نے مختلف موضوعات پرکھل کر اظہار خیال کیا۔
پروگرام کے دوران محبت کے حوالے سے بات کرتے ہوئے نوشین شاہ کا کہنا تھا کہ جب آپ کو کسی سے یک طرفہ محبت ہو جائے تو کسی امید اور توقع کے بغیر سامنے والے کو ہر وقت اپنی دعا میں رکھنا ہوتا ہے، یہ جانتے ہوئے بھی کہ سامنے والا مل نہیں سکتا۔
انہوں نے کہا کہ اس کے بارے میں اچھا سوچنا ہوتا ہے کیونکہ آپ کو محبت ہے، اس کی محبت کی عزت کرنی ہے، اس کے وقار کی بھی عزت کرنی ہے، اُس کا پردہ بھی رکھنا ہے۔
میزبان نے سوال کیا کہ کیا آپ کو کبھی یکطرفہ محبت ہوئی؟ جس پر ماڈل نے اعتراف کیا، میزبان نے پوچھا کہ کیا یکطرفہ محبت ایک سے زیادہ بار ہو سکتی ہے جس پر نوشین کا کہنا تھا کہ بار بار بھی ہوسکتی ہے، کیونکہ اگر ایک انسان نے دھوکا دیا ہو تو اس کا مطلب یہ نہیں ہوتا کہ دوسرا بھی دھوکا دے گا۔
