لاہور: سپیکر قومی اسمبلی راجہ پرویز اشرف کا کہنا ہے کہ الیکشن کمیشن نے ہر حال میں خود کو غیر جانبدار رکھنا ہے، سب کو لیول پلیئنگ فیلڈ دینا چاہئے۔ تمام جماعتوں کو کوشش کرنی چاہئے الیکشن متنازعہ نہ ہوں ورنہ سلیکشن کے نتیجے میں بننے والی حکومت ڈیلیور نہیں کر پائے گی۔
پریس کانفرنس کرتے ہوئے سپیکر قومی اسمبلی راجہ پرویز اشرف نے کہا کہ آٹھ فروری الیکشن کا دن مقرر ہے، ہمارے ملک میں شفاف الیکشن ہونا ضروری ہیں، شفاف الیکشن سے بننے والی حکومت ہی مسائل حل کرسکتی ہے۔
راجہ پرویزاشرف نے کہا کہ ہر حلقے کا امیدوار جیتنے کا دعویٰ کرتا ہے، ملک کے قومی اداروں کے خلاف کسی کا بیان سامنے نہیں آنا چاہئے، الیکشن کمیشن نے ہر حال میں خود کو غیر جانبدار رکھنا ہے، سب کو لیول پلیئنگ فیلڈ دینا چاہئے۔
سپیکر قومی اسمبلی نے کہا کہ الیکشن کوئی آسان بات نہیں، ان دنوں میں ہر چیز رک جاتی ہے، عوام باشعور ہیں، ہمیں اپنے ووٹر پر اعتماد کرنا چاہئے، الیکشن کے سوا کوئی چارہ نہیں ہے۔
انہوں نےمزید کہا کہ میں نے اپنی حد تک بطور سپیکر قومی سمبلی غیر جانبداری دکھائی، اس وقت رانا فاروق سعید قائم مقام صدر وسطی پنجاب ہیں اور میری کمی پوری کر رہے ہیں۔
